İslamda evlilik sadəcə bioloji və ya sosioloji bir ehtiyac deyil; sevgi, mərhəmət və Allahın razılığı üzərində qurulan müqəddəs bir bağ, bir ibadətdir. Qurani-Kərim və Həzrəti Məhəmmədin (s.ə.v.) sünnəsi bu bağı həm dünyada hüzur tapacağımız bir liman, həm də axirət səadətinə aparan bir körpü kimi təsvir edir.
“Sizin üçün onlarla ünsiyyət tapasınız deyə öz cinsinizdən zövcələr yaratması və aranızda sevgi və mərhəmət bəxş etməsi də Onun (varlığının və qüdrətinin) dəlillərindəndir. Həqiqətən, bunda düşünən bir tayfa üçün ibrətlər vardır.” (Rum surəsi, 21)
İslamiyyət qadın və kişini bir-birinə rəqib olaraq deyil, bir-birini tamamlayan, qoruyan və gözəlləşdirən iki varlıq olaraq görür. Evlilikdə ədalət, hörmət və nəzakət əsasdır.
“…Onlar (qadınlarınız) sizin üçün bir libas, siz də onlar üçün bir libassınız…” (Bəqərə surəsi, 187)
(Bu ayə ərlə arvadın tıpkı libas kimi bir-birinin qüsurlarını örtməsini, bir-birini xarici dünyanın çətinliklərindən qorumasını və bir-birinə zinət olmasını izah edir.)
İslam ailədaxili hüzurun davamı üçün həm kişiyə, həm də qadına müəyyən məsuliyyətlər yükləmişdir. Kişinin vəzifəsi ailənin ruzisini halal yolla qazanmaq və ailənin qoruyucusu olmaqdırsa, qadının vəzifəsi ailə ocağının hüzurunu və nizamını təmin etməkdir. Lakin hər iki tərəf üçün ən təməl qayda “gözəl dolanışıq”dır.
Kişi həyat yoldaşına qarşı nəzakətli, anlayışlı və səxavətli olmalıdır. İslam qadına əl qaldırmağı, onu aşağılamağı qətiyyən qadağan edir.
- Ayet-i Kərimə: “…Onlarla (qadınlarla) xoş və gözəl dolanın…” (Nisa surəsi, 19)
- Hədis-i Şərif: “Sizin ən xeyirliniz xanımlarına qarşı ən xeyirli olanınızdır. İçinizdə xanımına qarşı ən yaxşı davranan da mənəm.” (Tirmizi)
Qadın isə ərinin hüquqlarına riayət edir, ailənin şərəfini və evin məhrəmiyyətini qoruyur.
- Hədis-i Şərif: “Dünya bir meta (keçimlik)dir. Dünya nemətlərinin ən xeyirlisi isə salehə (yaxşı, əxlaqlı) bir qadındır.” (Müslim)
Evlilik birliyinin ən gözəl nəticələrindən biri də övlad sahibi olmaqdır. İslamda övlad ana və ataya Allahın müqəddəs bir əmanətidir. Onları gözəl əxlaqla böyütmək həm cəmiyyətə, həm də axirətə bir sərmayədir.
“…Rəbbimiz! Bizə gözümüzü aydınladacaq zövcələr və nəslimizdən olanları bəxş et və bizi təqvalılar üçün rəhbər et.” (Furqan surəsi, 74)
“Heç bir ata övladına gözəl tərbiyədən daha qiymətli bir miras qoya bilməz.” (Tirmizi)
İslamda ailə kiçik bir məscid, hüzurlu bir sığınacaqdır. Bir evdə qarşılıqlı sevgi, hörmət, səbir və Allahın razılığı əsas alındıqda, o yuva həm bu dünyada cənnətdən bir guşə olar, həm də cütlükləri axirətdə əbədi səadətə daşıyar. Peyğəmbər Əfəndimizin (s.ə.v.) buyurduğu kimi, həyat yoldaşlarının bir-birinə sevgi ilə baxması belə bir sədəqə və ibadət hökmündədir.